Хрватскиот министер за наука, образование и спорт Жељко Јовановиќ најави тужба против извршниот претседател на фудбалскиот клуб Динамо, Жељко Мамиќ поради навредливи напади.
Тужбата ќе ја поднесам поради болката кија Мамиќ со своите непримерни изјави ми ја нанесе на мене и на моето семејство, истакна Јовановиќ.
Тој вели дека нема да се согласи на компромис, а добиената отштета ќе ја донира во добротворни цели.
Мамиќ неодамна изјави дека Србин не може да го води ресорот спорт во Хрватска, што наиде на лавина реакции во хрватската јавност, по што беше приведен и мина една ноќ во притвор под обвинение дека го навредил министерот Јовановиќ и српското малцинство, со што поттикнал омраза кон сите Срби.
Мамиќ претходно денеска упати извинување до сите Срби кои се почувствувале навредени од неговата изјава, истакнувајќи дека немал намера да го навреди српскиот народ, но дека не се кае поради зборовите упатени до министерот Јовановиќ, пренесува макфакс.
Министерот Јовановиќ истовремено најави и тужба против претседателот на Семејната партија, Мате Кнезовиќ, бидејќи на интернет страната на партијата, наводно било истакнато соопштение дека приведувањето на Мамиќ е доказ за враќањето на комунистичко-српската репресија.