Министерството за здравство останува на ставот дека во спорниот свински врат на Екстра меин е присутна бактеријата листерија.
Во соопштението се вели дека според процедурите, земена е мостра од малопродажен објект во Гевгелија, со пополнет записник во присуство на претставници од Државниот санитарен и здравствен инспекторат, и истата е испитана во лабораторија на Центарот за јавно здравје-Велес.
-При испитувањата, утврдено е присуство на листерија(listeria monocytogenes ) и заради дополнителна сигурност и второ мислење, материјалот со идентификувана листерија е испратен до Институтот за микробиологија и паразитологија при Медицинскиот факултет во Скопје, каде што е потврдена листеријата и примерок е испратен на Факултетот за ветеринарна медицина, за генетска типизација. Примерокот е доставен под број, а без идентификација, односно без наведување на името на производителот, велат од Министерството за здравство.
Ова се документите кои Министерството ги доставило и до Основното јавно обвинителство-Скопје заради комплетирање на кривичната пријава против непознат сторител, која ја поднесе министерот Тодоров.
Резултатите од извршената генотипизација покажуваат дека генетскиот профил на изолираната листерија е 98% идентична со генотипот на листерија изолирана кај заболените лица. Како што информираше Комисијата за заразни болести, се работи за мостра од вакумиран сечкан свински врат, производ на Екстра-меин од Куманово (произведен 21.07.2014 година, со рок на траење до 04.09.2014 година), соопштуваат во Министерствопто за здравство.
Од таму потсетуваат дека досега се испитани над 650 мостри, од кои во 30 случаи се пронајдени примери на изолати на листерија(listeria monocytogenes,) кои се предмет на натамошна термичка обработка.
Од Министерството нагласуваат дека Комисијата за заразни болести располага со сите релевантни резултати, вклучувајќи и епидемиолошки анкети, увиди од терен и епидемиолошки анализи и за истите јавноста е навремено информирана.
НОВА веќе ги објави резултатите од супер-анализата направена во лабораторијата на Факултетот за ветринарна медицина, која е конечна и покажа дека во спорниот свински врат нема листерија.