Меѓународниот монетарен фонд го повлекува постојаниот претставник во Македонија, од втората половина на август, со завршувањето на мандатот на актуелниот претставник Патрик Гитон, соопшти ММФ.
Од оваа меѓународна финансиска институција велат дека локалната Канцеларија во Скопје ќе продолжи да функционира како врска за комуникација меѓу ММФ и земјата.
При донесувањето на оваа одлука ММФ имал предвид во отсуство на аранжман со Македонија, посилно присуство на претставник на теренот станува помалку потребно.
Сепак продолжува суштинската мисија на ММФ на следење на макроекономскиот развој и политика, како и обезбедувањето техничка поддршка. Тимови од ММФ ќе продолжат со редовните посети на Скопје на разговори со властите и претставниците на граѓанското општество.
Оваа одлука на ММФ може да се толкува како негативен сигнал за власта, бидејќи со години власта не склучуваше аранжмани со Монетарната мисија, целејќи кон комерцијални аранжмани кои подразбираат земање кредити со високи каматни стапки, кои директно се одразуваат и ја влошуваат економската состојба.
Во овој контекст, токму заради тоа економските експерти предупредуваат дека наметнувањето на високи камати претставува опасност и силен удар врз економијата, наместо да се земаат поволни кредити, што подразбира и аранжман со ММФ. Но, од друга страна, склучување на аранжман со ММФ повлекува одредени обврски, не само привилегии за државата – оваа Мисија преку контрола и мониторинг на финансиското работење на власта, превенира и дава црвено светло за потези кои водат кон уназадување и влошување на економските состојби.