Додека српското МНР веќе формирало работна група која ја следи безбедноста на туристите и ќе интервенира при евентуално итно враќање назад, Македонската Влада досега не се изјаснила дали имаат план доколку македонски граѓани побараат да бидат вратени назад.
Во МНР сеуште немаат информации дали во моментот македонски граѓани престојуваат во Египет. Од таму велат дека нема граѓани кои пријавиле престој на повеќе од три месеци, а досега никој не побарал помош откако ситуацијата ескалира со 523 загинати и огромен број ранети.
Од одделението за односи со јавноста велат дека иако телефонските врски се отежнати, тие од утринава се во постојан контакт со амбасадорот Миле Манолев. Тој потврдил дека ниту една држава засега не ја затворила својата амбасада и покрај прогласувањето на вонредната состојба, но и дека ситуацијата е ставена под контрола со оглед на тоа што во судирите се вмешала и армијата.
-Иако ситуацијата се менува од час во час, амбасадорот се чувствува безбедно велат во МНР.
Од повеќето туристички агенции кои вчера ги контактираше НОВА потврдија дека аранжманите за Египет се откажани уште пред еден месец, кога добиле известување од Србија дека тие ги откажуваат чартер летовите.
Но, со оглед на тоа дека во моментот во Египет се наоѓаат 600 српски туристи, а утре треба да заминат уште 200, останува отворено прашањето дали можеби македонски граѓани заминале таму на одмор преку некоја од српските туристички агенции.
Српските медиуми денеска јавуваат дека и покрај тоа што се откажани повеќето аранжмани во Србија, од Туристичкиот сојуз информирале дека безбедноста на туристите кои се наоѓаат таму не е загрозена и дека постои акционен план за нивно враќање назад доколку тоа е потребно.
-Ситуацијата во Хургада е мирна и таму во моментот престојуваат од 45 000 до 50 000 странски туристи од Европа и Русија изјавил Александар Сеничиќ директор на Здружението на туристички агенции во Србија.
Во повеќето туристички агенции во државата вчера се пожалаа дека во вакви ситуација владата обично не интервенира и целиот товар околу враќањето на туристите го остава на нив, со што се губат огромни финансиски средства.