Ниту еден граѓанин досега не се обратил за помош во македонската амбасада во Египет, откако од утринава започнаа крворолевањата и хаосот во оваа земја, информираат за НОВА во МНР.
Во Министерството немаат податоци дали во моментот таму престојуваат македонски граѓани, особено што секој престој подолг од три месеци се пријавува и евидентира во конзуларниот оддел, велат во одделението за односи со јавноста.
Нема информации ниту дали во моментот таму престојуваат наши граѓани кои заминале во оваа земја во сопствена режија. Хорот на МНТ кој наредната недела требаше да патува таму, го откажа својот настап.
-Ние сме подготвени да им помогнеме на сите оние на кои им е потребна заштита, но искрено не веруваме дека во ваква ситуација наши граѓани престојуваат таму, велат за НОВА во оделението за односи со јавноста во МНР.
Од утринава, телефонските линии и интернет врските со македонската амбасада се многу отежнати. Сепак, од Министертвото велат дека успеале да стапат во контакт со амбасадорот Миле Манолев преку сателитска линија.
Манолев информирал дека амбасадата е безбедна, дека тој нормално ги извршува работите и засега нема потреба од негово повлекување. Манолев нагласил дека во Египет не е прогласена вонредна состојба, а опасноста е во регионот на двата кампа, каде што во текот на денот има големи немири и интервенција на полицијата.
Новинските агенции од утринава јавуваат за многу убиени, а Муслиманското братство вели дека има стотици загинати и над 8000 повредени во околината на двата кампа окупирани од симпатизерите на соборениот претседател Мохамед Морси во Каиро.
НОВА контактираше неколку туристички агенции од Македонија. Од таму велат дека аранжманите за Египет се откажани, а со оглед на ситуацијата граѓаните ова лето немаат интерес да патуваат на оваа дестинација.
-Немаме аранжмани за Египет откако пред еден месец стигна известување дека и агенциите од Белград ги отакжуваат патувањата и чартер летовите на оваа дестинација. Не верувам дека било која друга туристичка агенција од Македонија организирала летување таму, изјави за НОВА Мирче Пешевски сопственик на туристичката агенција Савана.
Истото ни го потврдија уште во неколку туристички агенции, кои инсистираа на анонимност, од каде потенцираа дека Египет не е веќе на листата на привлечни дестинации за летување. Од агенциите велат дека она што посебно ги загрижува е што во вакви ситуации Владата обично не интервенира за да организира летови со кои патниците ќе се вратат назад, туку тоа го остава на товар на агенциите кои имаат проблем да го реализираат тоа, а воедно губат огромни финансиски средства.
Ситуацијата во Египет се повеќе ескалира. Во македонското МРВ велат дека ја следат состојбата и се надеваат дека ќе се најде компромис и решение на кризата.
ВИДЕО: Египет денеска, Euronews