„Во очекување на судската завршница, а имајќи предвид дека госпоѓа Чаусидис е синдикален лидер, Комитетот бара од Владата да обезбеди нејзино итно враќање на работа“ се вели во заклучоците на Комитетот за слобода на здружување при Меѓународната организација на трудот (МОТ).
Комитетот за слобода на здружување на Меѓународната организација на трудот ја разгледа жалбата на Синдикатот на новинари и медиумски работници во случајот со отпуштањето на претседателката Тамара Чаусидис.
Комитетот со жалење констатира дека трудовиот инспекторат пропушти да ги адресира и воопшто да ги земе предвид тврдењата на претседателката на ССНМ дека нејзиното отпуштање е акт на анти-синдикална дискриминација туку се ограничи само на констатирање на наводно спогодбен отказ.
Комитетот со загриженост забележува дека ова е втор таков случај со наводно лажен спогодбен отказ во иста медиумска куќа и дека и двата случаи се уште чекаат судска разврска.
Во препораките на Комитетот се бара од Владата на Република Македонија да ги преземе сите мерки, во иднина, трудовите инспектори целосно да ги истражат наводите за антисиндикална дискриминација и да обезбедат таквите случаи да бидат брзо и ефикасно истражени, како и да го информира Комитетот за развојот на настаните во таа насока.
Воедно од Владата се бара да информира за исходот од судската постапка покрената од Чаусидис за која бараат да биде завршена без одлагање.
Целиот текст од наодите на Комитетот за заштита на слободата на здружување на МОН можете да го проследите на следниов линк.