Португалскиот фудбалски стручњак Жозе Мурињо повеќе нема да биде тренер на Тотенхем објавија „Телеграф“ и уште неколку други британски медиуми.
Според нив, управата на лондонскиот клуб одлучила да го отпушти 58-годишниот Мурињо.
„Специјалниот“ ја презеде тренерската функција на Спарс во ноември 2019 година. Неговиот договор беше важечки до летото 2023 година.
По 32 одиграни кола во Премиер лигата, Тотенхем е на 7. место во поредокот со 50 бода.
Во досегашната кариера Мурињо претрпе само 15 порази на 127 натпревари во Порто, 21 пораз на 185 натпревари во Челси, загуби само 15 пати од 108 настапи на Интер, имаше 22 порази на 178 натпревари во Реал и загуби најмногу пати со Тотенхем, 23, во 86 натпревари.
Португалецот го наследи Маурицио Покетино како тренер на Тотенхем пред 17 месеци, но минатата сезона стигна само до шестото место во Премиер лигата. Отпуштањето следеше кратко по шокантната елиминација од загрепски Динамо во Лигата на Европа во март, и само два освоени бода на претходните три настапи во шампионатот.