Извештајот на американскиот Стејт Департмент за инвеститициската клима во Република Македонија за жал го потврдува она што веќе подолг временски период го забележуваат голем број меѓународни владини и невладини организации, а тоа е дека – Македонија е земја со распространета корупција и земја која создава непредвидливи услови за странски инвестиции, тврди пратеникот на ВМРО-ДПМНЕ, Тимчо Муцунски.
Според него, од Извештајот може да се заклучи дека во последните четири години владеење на СДСМ и ДУИ не може да се забележи некој посериозен и позначаен исчекор во реформата на правосудниот систем и јавната администрација, а со цел да се создаде подобро деловното окружување и соодветни услови за унапредување на економските активности.
– Дополнителен доказ во прилог на искажаните аргументи е и фактот дека во овој Собраниски состав кој наскоро ги заокружува активностите од првата година од својот мандат, Владата не понуди ниту еден суштински закон кој на преден план ја има реформата на правосудството и администрацијата. Наведените аргументи упатуваат на едноставниот заклучок дека брзите промени се неопходни, бидејќи без опипливи реформи, без создавање на подобри и предвидливи услови за деловната заедница и обезбедување на поквалитетни и подобро платени нови работни места за нашите граѓани нема да има ниту видливи економски резултати и одржлив економски развој, порача Муцунски.