Крадење на македонски регистарски таблички од возила или оштетување на возила на наши државјани во соседна Грција продолжува и понатаму.
Во текот на завчерашниот и вчерашниот ден од страна на граничната полиција евидентирани се пет нови случаи – две оштетувања и три кражби на регистарски таблички.
Притоа, во едниот случај во местото Фурка возило марка “шкода фабија“ е оштетено со гребење при што на левата страна од возилото на грчки јазик била испишана паролата “Македонија е Грчка“, а во вториот случај во грчкото одморалиште Перфкохори возило марка “хонда акорд“ е оштетено, веројатно со киселина.
Исто така, повторно во Ханиоти украдени се двете регистарски таблички од возило марка “опел“, а кражби од наши државјани во грчката полиција се пријавени и во туристичките места Јерисос (возило марка “форд фиеста“ со скопски таблички) и Амуљани (возило марка “БМВ“ исто така со скопски таблички), се вели во соопштението на МВР.
Во изминатиот период од страна на нашата гранична полиција евидентирани се 30 одземања, односно кражби на регистарски таблички во кои во повеќето или во 23 случаи се украдени обете таблички. И натаму предничи туристичкото место Ханиоти каде што досега се евидентирани 13 кражби и Неа Пори (5). По однос на оштетените возила бројката на вакви настани сега нарасна на шест случаи.