Министерството за внатрешни работи најостро ги осуди инцидентите што се случија синоќа за време на протестите на т.н „Илинден 4“ во Скопје и најави дека ќе ги употреби сите капацитети за целосно да ги расчисти и санкционира одговорните.
Министерот Агим Нухиу денес на прес-конференција потенцираше дека ќе бидат санкционирани сите обиди за нарушување на јавниот ред и мир и апелираше до сите граѓани да се воздржат од секаков вид насилство и нарушување на правниот поредок.
– Граѓаните имаат право да протестираат на еден демократски начин, да се собираат на јавни места и да ги изразат своите ставови, но Законот за јавен ред и мир мора да се почитува. Би сакал да упатам апел до граѓаните сите свои ставови и мислења да ги изразат без нарушување на правните суштински вредности, рече Нухиу.
МВР информираше дека вчера се случиле три инциденти во коишто повредени биле петмина.
Покрај нападот врз новинарот и снимателот на интернет порталот „А1 он“, се случиле и две тепачки во близина на Народната банка и кај „Веро Џамбо“.
Помошникот министер за односи со јавност, Јордан Ламаноски информираше дека биле извршени три кривични дела „насилство“.
Во однос на првиот случај, на информативен разговор повикани се 12 лица, а според сознанијата на МВР извршители на нападот на новинарот и на камерманот биле двајца. Ламаноски информираше дека во предвид се земаат сите фотографии и видеа од протестите како и информациите од полициските службеници кои биле во непосредна близина за да се најдат напаѓачите.
МВР работи на расветлување и на останатите два инциденти.