Од утре ќе се разгледува прокетот „Мој термин“ за да се види какви измени треба да се направат,најави денеска министерот за здравство Арбен Травари на одбележувањето 25 години од основање на Лекарската комора. Тој најави дека проектот Работа по учинок, ќе остане, но нема да има негативен учинок како до сега, односно од еден лекар да се зема од плата, за на друг да се дава.
„Тоа е првиот чекор што ќе биде направен. Ќе се консултираме со правниот тим како тоа да се изведе. Нема да ни требаат двајца директори на болниците, тие ќе станат шефови на администрација, а со тие пари ќе се стимулираат докторите во делот за учинокот“, рече денеска Таравари на одбележување на денот „25 години од основање на Лекарската комора“.
Тој најави дека многу бргу ќе започне да се работи на десетгодишна Стратегија во здравството, за наскоро да може да се излезе со конкретни работи. Таравари ја посети Лекарската комора каде што имаше средба со новото раководство, како и со поранешните претседатели кои се заслужни за основањето и развојот на ова еснафско здружение.
Лекарска комора е формирана на 5 јуни 1992 година. Иницијативата за формирањето на Комората во Македонското лекарско друштво ја покренале неколку доктори врз основа на сознанијата за развиените земји во светот.
На Првата конститутивна седница присуствувал и првиот претседател на Р.Македонија Киро Глигоров.
Во оваа комора на почетокот членувале доктори по медицина и по стоматологија. Во 1995 година стоматолозите се издвојуваат и формираат нова Стоматолошка комора.
Лекарската комора на Македонија е наследник на лекарската комора која постоела на овие простори во третата деценија на минатиот век во тогашното кралство Југославија.