На 5 ноември Европската комисија (ЕК) ќе ги објави извештаите за напредок на земјите од Западниот Балкан и Турција. Македонија овој пат, со оглед на компликуваната политичка ситуација, ќе добие условена препорака за старт на преговори за членство во ЕУ, дознава НОВА.
Ова е преседан и за прв пат се случува, не само во македонскиот случај, туку и во севкупната историја на проширувањето на ЕУ.
Условот ќе биде спроведувањето на договорот од Пржино а можно е ЕК да направи и нов извештај посветен токму на овој договор во првата половина на 2016 година.
Извештајот за напредокот на Македонија на патот кон ЕУ е веќе напишан. Во него нема да има многу изненадувања освен можеби еден вид нова методологија која Европската комисија (ЕК) ќе ја воведе годинава. Според овој начин на известување, извештајот треба да стане полесен за читање а ќе се воведат споредби помеѓу земјите кандидати за членство па секој од нашиот регион ќе може лесно да види каква е неговата ситуација во некоја област во споредба со истата област во друга земја од регионот.
Според нашите извори, на масата било и замрзнувањето на препораката. Овие сценарија сепак биле отфрлени бидејќи според проценките на европските дипломати одземањето или замрзнувањето на препораката би имало негативен ефект за земјата и нејзината економија но не ни било добро за ниту една партија во Македонија.
Замрзната или одземена препорака веднаш би активирало серија меѓупартиски обвинувања за тоа кој треба за тоа да се обвини, а тоа, според Брисел “не е целта на извештајот и сега не е време за такви дебати – Македонија мора брзо да се врати на примената на договорот од Пржино”, вели нашиот извор.
Сценариото за условена препорака се смета и за најсоодветно бидејќи ЕК очекува дека и понатаму ќе има блокади секогаш кога владеачката партија ќе оцени дека тоа може да го направи па условото за одржување на препораката би бил ефикасен инструмет за држење на состојбите под контрола.
Малинка Ристевска-Јорданова од Институтот за европска политика од смета дека условената препорака е најдобриот начин за ЕК да го искаже своето незадоволство од власта но истовремено да не ги казни македонските граѓани:
“Изгледа најизвесно дека ќе се задржи препораката, но со услов – исполнување на политичкиот договор од Пржино. Ова, во конкретната ситауција, изгледа и најдобра варијанта. Од една страна – не се казнуваат веднаш државата и граѓаните, заштосекако последиците од одземање на препораката ќе ги трпат сите. Од друга страна, се дава уште една шанса за институционално решавање на кризата. Но, она што е најважно е дека по изјавата на амбасадорите на државите членки во ЕУ,одговорноста за неисполнување на политичкиот договор од Пржино е многу јасно лоцирана во премиерот Груевски и тој неможе да избега од неа”, вели Ристевска-Јорданова.
Се очекува утре ЕК да го потврди 5 ноември како датум за објавување на извештаите.