Се откачил лифт на Клиниката за кардиологија додека во него се возел болничар, дознава НОВА од вработени на клиниката. Инцидентот се случил пред една недела, а во тоа време во лифтот, со кои се носат пациенти на интервенции бил само болничарот.
Вработениот од првиот спрат паднал во подрумот, по што веднаш му била укажана лекарска помош , а бил сниман и на компјутерска томографија. Вработени на клиниката велат дека цела среќа што во моментот во лифтот немало пациент за коронарографија која се работи во подрумските простории.
НОВА го пронајде болничарот кој бил во лифтот за време на инцидентот. Во првичниот разговор тој ја потврди информацијата и замоли да се јавиме подоцна бидејќи во моментот го прегледувал лекар. Но, кога повторно го побараме, демантираше дека воопшто бил во лифтот, инсистираше да му кажеме кој ни ја дал информацијата и како сме дошле до телефонски број за кој самиот рече дека е службен. Неговото однесување беше грубо, со висок тон и навредливо.
На Клиниката за кардиологија за НОВА потврдија дека на 19 јуни транспортниот лифт се спуштил 40 до 50 сантиметри под нивото на подрумот, но велат тоа не било откачување, ниту паѓање.
-Веднаш е направен увид од фирмата која ги одржува лифтовите. Констатирано е дека се скинала врвка на вратата од лифтот, по што лифтот се спуштил 40 до 50 сантиметри под нивото.Вработениот веднаш е однесен на лекарски преглед, но не се констатирани повреди. Денеска е направена уште една проверка од друга фирма и се е во ред, нема никакви проблеми со лифтот, изјави за НОВА доктор Лидија Поповска портпарол на Клиниката.
Поповска вели дека не се точни информациите дека во моментот работи само еден лифт, и дека пациентите се качуваат пешки.
-Проблеми нема, сите лифтови работат. Тие се во употреба од 23. 11.2013 година и се сервисираат и проверуваат секој месец, изјави Поповска.
Сепак, вработени велат дека во изминатите 3-4 месеци имало проблеми со лифтовите, при што тие често се расипувале. НОВА консултираше и стручни луѓе кои работат на поправка на лифтови и тие објаснија дека вакви ситуации најчесто настануваат поради преоптовареност или дотрајаност, при што лифтот ја промашува станицата, односно спратот и се спушта под нивото, во просторот кој служи за поправка на дефекти.