Изградбата на новиот Клинички центар „Мајка Тереза“ се уште тапка во место. Иако по уривањето на старата зграда на гинекологија на почетокот на годинава, требаше да започне изградбата на новиот објект, таму се уште стојат само ископани темели и огромна дупка која зјае празна.
Стартот на изградбата беше најавен на 2-ри јануари годинава, каде присуствуваа и премиерот Груевски и министерот Тодоров. Тогаш беше речено дека е предвидено рушењето на старата зграда да трае три месеци, по што работите ќе продолжат со изградбата на новиот грандиозен објект.
„Ова е голем капитален проект за сите граѓани на Република Македонија. Во изградбата на новиот Клинички центар се вложени 70 милиони евра. Во него ќе бидат сместени сите клиники, освен инфективната клиника. На страна од клиничкиот центар „Мајка Тереза“ ќе остане и Клиниката за детски болести, каде ќе биде сместена и детската хирургија. Три ката на хирургија ќе бидат слепени со овој објект. Со топол премин ќе биде поврзана и новата зграда на Клиниката за гинекологија“, рече тогаш премиерот Груевски.
Во обид да дознаеме каде заглавија работите, на веб страната на Министерството за здравство наидовме само на текст од август 2013-та година, каде меѓу другото стои:
„ Изградбата на новиот објект се очекува веднаш по завршување на проектите, односно по добивањето на потребните дозволи и завршување на претквалификациите за фирми за градба. По Нова година се очекува да заврши комплетното проектирање, по што ќе следи период на ревизии, добивање дозвола за градба и избор на најповолен изведувач кој ќе го гради новиот клинички центар.“
Еве, наближува и втората Нова година, а од новиот Клинички центар се уште нема ништо.
Нема објаснување што во меѓувреме се случува со изградбата на новиот објект, ниту на веб страната, ниту пак Министерот Тодоров не излегол официјално во јавноста да објасни кои се причините за застојот. Што се случи, зошто не е започната изградбата на објектот, која е причината што работите стагнираат? Ова се прашањата кои НОВА ги испрати на адреса на Министерството за здравство, на кои не добивме никаков одговор.
Инаку, предвидено беше изградбата на Клиничкиот центар да трае три години, односно целосно да биде завршен во 2017-та година. Годината измина, а просторот се уште стои празен, таму нема донесено никаква механизација, нема ниту трага од новиот објект.
Во август 2013 година беше најавено дека идејното решение ќе го изработи италијанската проектантска куќа Арен СРЛ за шест месеци и дека ќе чини 1, 3 милиони евра. Објектот ќе се протега на површина од 61 500 метри квадратни, а почетокот на градбата министерот Тодоров ја најави за оваа 2014-та година. Целиот проект планирано е да чини 70 милиони евра, а парите треба да бидат обезбедени од кредит од Банката на Советот на Европа.