Жестока и тензична атмосфера, придружена со жолчни расправи – вака државната комисија пред пет ден одлучуваше за приговорите на ВМРО ДПМНЕ за општина Центар.
Но, на што всушност се пожали владејачката партија?
Притисоци врз гласачите, нарушување на јавниот ред и мир на гласачките места, недозволена проверка на документи и фотографирање на податоци за да се искористат за доставување до медиумите, вербални и физички притисоци на лица кои гласаат.
Ова владејачката партија го користеше како аргумент. Се се вртеше околу Пустец и гласачите од Пустец беа центарот на вниманието. Речисите сите аргументи беа дека токму ним им било нарушено гласањето.
Работата отиде дотаму што претставникот на ВМРО ДПМНЕ во ДИК, во еден момент ја стави и под знак прашалник легалноста на гласачите од Пустец, иако токму опозицијата обвини дека нивниот престој овде е организиран од власта.
Но што содржеа приговорите?
Избирачко место 2839. ВМРО ДПМНЕ приговара дека е нарушена тајноста на гласањето од страна на претставник на СДСМ кој ги одземал и личните карти на гласачите чии податоци ги читал по мобилен телефон. Во рок од пет часа по составувањето на записникот забелешките се доставени до Општинската изборна комисија од страна на овластениот претставник на ВМРО ДПМНЕ. Но, наместо конкретни забелешки доставен е празен бел лист хартија потпишана од претставникот без да биде внесена ниту забелешка.
ДИК го одбива приговорот како неоснован бидејќи не се доставени докази за она за што се приговара.
Најголемиот дел од приговорите се одземањето на личните карти на гласачите од Пустец и нивна идентификација и запишување на бројот на личната карта. ДИК ги одбива приговорите со образложение – идентификација на гласачко место е дозволена и тоа не е основ за поништување на гласањето.
Сепак, ВМРО ДПМНЕ решава да се жали на Управен суд. Управниот суд ги поништува повеќето од одлуките на ДИК. Во Центар повторно ќе се бира градоначалник. По трет пат граѓаните на Центар ќе одлучуваат. Но, останува горчливото прашање – ќе дојдат ли пак гласачите од Пустец?
Луѓето како Вангел Јанкула од Пустец можеби ќе дојдат а можеби и нема да дојдат да помогнат нечија победа во третиот круг. Но тие ќе останат илустрација за безмислоната битка за освојување на Центар, општината татковина на мегапроектот „Скопје 2014“.