Најмалку 28 луѓе загинале и стотици други се повредени во денешните пресметки во Египет помеѓу приврзаниците на соборениот исламистички претседател Мохамед Морси и полицијата, соопшти претставник на тамошното министерство за здравство.
Припадниците на движењето Муслиманско братство во неделата протестираа против војската на плоштадот Тахрир во Каиро, каде што илјадници поддржувачи ја одбележуваа 40-годишнината од војната против Израел од 1973 година.
Според портпаролот на министерството за здравство, околу 26 луѓе загинале во главниот град Каиро, едно во Бени Сеуф и едно лице во Делга во провинцијата Минија, 300 километри јужно од египетската престолнина, пренесува „Ал Ахрам“.
Министерството за внатрешни работи на Египет соопшти дека најмалку 200 проддржувачи на Морси се приведени во нивниот налет „да ги освојат египетските плоштади“.
Националната алијанса за поддршка на законитоста, коалиција на исламските сили кои го поддржуваат отстранетиот претседател Мохамед Морси, тврдат дека најмалку 11 нивни членови се убиени во судирите со безбедносните сили во улицата Рамсис во центарот на Каиро. Приврзаниците на Муслиманското братство, од кое произлезе Морси, организираа во неделата, како и претходно во петокот кога загинаа четири луѓе во Каиро, масовни маршеви во неколку места од провинцијата околу главниот град, како и во Гиза и во другите провинции.
При маршот кон плоштадот Тахрир избил судир меѓу исламистите и противниците на Морси од локалното население, при што се вмешала полицијата која за да ја растера толпата употребила солзавец, додека подоцна според очевидци, се слушале истрели од тешко огнено оружје.