Болните од рак на дебело црево, кои се со метастази, веќе трета недела се оставени без цитостатици во венозна и таблетарна терапија. На Клиниката за онкологија го нема, па пацинтите се принудени да го купуваат, кој од нив има финансиска можност, се разбира.
Тешко болен човек кој се јави во редакцијата на НОВА, вели дека тој не прима терапија бидејќи не е во можност да го купи лекот за кој треба да плати 100 евра месечно.
„На Клиниката за онкологија го нема лекот. Јас сум без терапија, со мојата пензија од 6000 денари не сум во можност да го купам“, се пожали овој 60 годишен пациент. Освен овој на Клиниката за онкологија нема уште еден лек кој е неопходен, а од таму велат дека ќе снема уште три вида цитостатици до 9-ти мај кога ќе биде отварањето на тендерот. На онкологија повторно го обвинија Советот за јавни набавки, кој во петокот по трет пат им го вратил тендерот.
Велат, образложението од Советот било дека„нема елементарна непогода, односно нема земјотрес и поплава и дека ништо не е итно“. Но, ситуацијата е алармантна бидејќи и залихите од другите лекови се при крај, предупредуваат од таму. „Ние им даваме документ и рецепт за Фондот да им ги рефундира парите. Но, до отварање на тендерот ќе снема уште три лека“, изјави за НОВА Милан Ристески.
Тој објаснува дека буџетот за годинава го добиле многу доцна, па подоцна бил донесен и планот за јавни набавки. Но, нема реално објаснување зошто Советот за јавни набавки три пати го враќа тендерот. Лекарите предупредуваат дека терапијата не смее да се прекинува, бидејќи со тоа се загрозува здравјето, а болеста напредува.
Од друга страна правните служби на клиниките кои ги контактираше НОВА, велат дека доколку и му се издаде потврда на пациентот, Фондот ќе му ги врати парите дури откога ќе ги земе од клиниката, а самата клиника ја казнува бидејќи не смее да остане без лекови. Пред извесно време министерот Тодоров испрати известување до клиниките со кое им се забранува да ги праќаат пациентите сами да си купуваат лекови, во спротивно ќе бидат казнети.