На 19 февруари годинава, во едно дождливо предизборно претпладне, во рамките на кампањата за локалните избори, премиерот Никола Груевски фрли неколку лопати бетон во претходно поставениот камен темелник и со тоа го означи почетокот на градбата на последната, седма државна катна гаража во центарот на Скопје, која се наоѓа веднаш наспроти Новиот стар театар и до Музејот на холокаустот.
Оттогаш, речиси три месеци подоцна, градењето на катната гаража сѐ уште не е почнато. На средината од градилиштето, лево од камионот на снимката, уште може да се види местото каде што премиерот Груевски го постави камен темелникот и толку.
Но, веднаш потоа градилиштето почна да се користи како гаража и во него во работно време постојано има паркирани возила. Од почеток тие беа паркирани низ целото градилиште, но последните дождови почнаа да создаваат кал и дупки полни со вода, па бројот на паркирани возила како да се намали. Покрај ова, на градилиштето му е најдена уште една намена – како магацин. Во него се складираат дрвени подножја за палети со плочки, кои работниците ги поставуваат во дворот од Новиот стар театар отспротива, а има и куп дрвени трупци кои или се искористени или допрва треба да им се најде намена.
Инаку, поставувањето на камен темелникот беше беспрекорно организирано, освен доцнењето на премиерот од 30 минути кое веќе станува традиционално кога тој треба да се појави некаде. Истите контејнери што треба да ги користат градежниците во текот на изградбата стојат уште оттогаш.
Од друга страна, пак, во своето поздравно обраќање, премиерот особено истакна дека проектот за оваа катна гаража е правен така да биде „bankable“ (демек, прифатлив за банките), што значи дека кредитот е обезбеден и дека изградбата веќе требаше да биде почната. Но, испаѓа дека далеку побитно било поставувањето на камен темелникот насред избори отколку вистинската изградба.
Премиерот во таа прилика истакна и дека оваа катна гаража ќе им биде добредојдена на оние што работат во околните згради, но тие се чини дека го претекнаа и не почекаа таа да се изгради, туку веднаш почнаа да се паркираат на калливото градилиште.
Оваа катна гаража, инаку, е најскапата по цената на чинење на едно паркинг место. Таа треба да чини 237,2 милиони денари (3,86 милиони евра) и да содржи 169 паркинг места. Ова значи дека едно паркинг место ќе чини 22.820 евра.
Ваквата цена значи и дека ќе бидат потребни 45.640 паркирања за тоа да се отплати. А, толку многу паркирања значат дека тоа паркинг место ќе треба да биде полно секој работен ден (без викенди, но и во празници) и тоа 12 часа дневно нон-стоп по цена од половина евро на час за да се исплати после 14 и пол години.
Се разбира, кога се вели да се исплати, се мисли на основниот трошок на градба, без каматите за кредитите и без сите други трошоци што ќе бидат направени во тој период од 14 и пол години какви што се плати, струја, вода, парно, бензин, телефони, интернет, одржување, обезбедување и што уште не.