Долгогодишната уредничка на Македонската редакција на Би-Би-Си во Лондон, новинарката со битолско потекло Жанета Скерлев денес заедно со својот сопруг дојде во посета на подрачното училиште „Др.Трифун Пановски“ во битолското село Трново. Заради ситуацијата со пандемијата со КОВИД-19 учениците и наставниците ја пречекаа Скерлев во школскиот двор.
Една од причините за посета на училиштето беше донација, нешто што Скерлев во континуитет го прави подолго време.
„Морам да искажам огромна благодарност Жанета Скерлев, затоа што со својата хуманост со она што го направи навистина успеа да измами насмевки и радости кај самите дечиња. Јас верувам дека великодушноста пред се е личен избор и дека е благослов на онај што дава и оној што прима. Великодушноста и самата големина на Жанета Скерлев е во тоа што таа се откажа во нејзиниот роденденски подарок и истиот го пренамени во целосна опрема за нашето училиште, рече наставничката Ленче Илиевска.
Ја прашавме Скерлев како започна целата приказна.
„Целата приказна почна кога нашите комшии имаат две деца кои што учат во ова училиште и не викнаа ајде дојдете имаме приредба. Бевме пријатно изненадени колку сето ова во скудни услови успеа учителката да го направи како нешто што не потсети на она што го гледавме во Лондон од нашите пријатели и си рековме мора да изнајдеме начин да им направиме нешто на овие деца . Тогаш што да ви кажам , ѕидовите беа излепени со цртежи за да не се гледаат испукнатините на ѕидовите, греењето беше на ќумбе кое се обидуваше некако да внесе топлина, меѓутоа мислам дека најголемата топлина беше од напорот на учителката Ленче“, рече Жанета Скерлев.
По разговор со сопругот што е она што можат да го направат за дечињата, а во пресрет на нејзиниот роденден решила да направи донаторска акција, каде што нејзините пријатели место роденденски подарок ќе донираат средства за учлиштето.
„Во Англија постои таков обичај да се донираат пари за разни цели и решивме за мојот роденден да им кажам на моите пријатели не ми купувајте подароци, нема да организирам веселби, семејни прослави , туку ќе отворам на фејзбук една посебна страница на која ќе ми донирате, кој колку сака и може. Во рекорден рок од околу месец и половина собрав некаде околу 1000 фунти. Им кажав на луѓето за што ми се парите, а Ленче ја прашав што им треба, таа ми рече дидактички материјали“, рече Скерлев.
Откако ги собрала средствата, пред да почне пандемијата со Ковид 19 дошла во Трново каде заедно со наставничката Ленче отишле да ги набават потребните материјали кои што им се неопходни на учениците за да можат полесно да ја следат наставата. Денеска донесоа телевизор, а за донацијата да биде комплетна тие заедно со сопругот донираа звучници. Минатата година за училиштето донираа и комјутер.
„Со Ленче ја помогнавме битолската економија. Низ битолските продавници и книжарници отидовме да купиме се. Денеска го донираме последното, она што го ветивме од парите кои што ги собравме го зедовме телевизорот“, додаде Скерлев.
За сите нив денеска беше радосен ден.
„Денешниот ден посебно е радост затоа што децата телевизорот го очекуваа со нетрпение. Ако порано импровизиравме и правев најчесто од отпадни материјали, сега условите за работа се на многу високо ниво“, рече наставничката Илиевска.
Во знак на благодарност Скерлев од директорот на училиштето Пецо Димовски доби благодарница.
Во подрачното училиште „Др.Трифун Пановски“ во с.Трново наставата ја следат 12 ученици од прво до петто одделение.