Генералниот секретар на НАТО Јенс Столтенберг денес рече дека не сака да ги коментира информациите дека во Македонија странски разузнавачки служби вршат прислушкување. Но тој подвлече дека медиумите и опозицијата мораат да имаат добри услови за работа:
“Не сум во можност да ја коментирам информацијата дека странски разузнавачки служби биле активни во поранешната југословенска Република Македонија. Она што можам да кажам е дека ја подвлеков важноста слободата на медиумите и важноста да и даде на опозицијата можност да има добри услови за работа, тоа се демократски вредности кои треба да се почитуваат од страна на сите. И ја подвлекувам важноста на има независна и длабока истрага во многу сериозните обвинувања кои беа кажани. Исто така дека треба одговорните треба да поднесат сметки за тоа што се случило. Затоа е важна независна и длабока истрага за овие обвинувања”, рече првиот човек одговарајќи на прашање на НОВА.
НОВА го праша премиерот Груевски дали пред генерaлниот секретар на НАТО ги идентификувал странските служби кои, според владата, направиле пуч во Македонија. Но НОВА не доби јасен одговор на ова прашање на кое Груевски одговори:
“Јас прилично подробно ја опишав ситуацијата околу тоа што се случуваше во последниот период, безмалку една година тргнувајќи од сето она што ми беше презентирано во разговорите со шефот на опозицијата, преку оние работи што беа откриени од страна на министерството за внатрешни работи и обвинителството и презентирани на суд вклучувајќи ја судската пресуда која веќе постои како и признанијата на одредени луѓе во судската постапка за илегални активности и злоупотреба на службената должност односно и ги прекршиле законите на Република Македонија. Сето тоа друго ќе биде дел од понатамошната судска постапка која ќе биде јасна, транспарентна и отворени сме за било каков мониторинг во тој дел.”
Инаку средбата на Груевски и Столтенбер била одамна закажана. Се размислувало таа да се одржи во четири очи но решено е сепак на средбата да присуствуваат и министрите за надворешни работи и одбрана како и советници на генералниот секретар.
Според Столтенберг пред Македонија стојат предизвици: “Ги следиме со загриженост новите новите настани. Напредокот на реформите зависи од ефективен политички дијалог, правната држава и слободната на медиумите кои се во срцето на нашата алтантска заедница. Сметаме на вас сето тоа да биде почитувано. Бараме од сите политички сили да бидат одговорни, да влезат во отворен и конструктивен дијалог и да се фокусираат на политичките и економски реформи кои се неопходни за евро-атлантска интеграција”.
Во однос на проблемот со името Столтенбер рече дека се сеќава на сите дискусии во Букурешт во 2008 година но повтори дека за членството во НАТО е потребен консензус на сите членки на алијансата.
“Решение за името мора да се најде пред да влезете во НАТО и бараме напори во таа насока”.
Според Груевски Македонија ќе ги надмине сите проблеми пред кои е исправена и дека од нив ќе излезе уште посилна.
Столтенберг ги пофали македонските реформи во одбраната и се заблагодари за учеството на македонските војници во Авганистан и Косово.