Шефовите на држави и влади на 30-те земји членки на НАТО денеска се состануваат во Брисел на координација за следните одговори на војната во Украина и руската агресија, јави дописничката на МИА од Брисел.
Премиерот Димитар Ковачевски, но и претседателот на САД, Џо Бајден, како и сите останати лидери на Северноатлантската алијанса, синоќа пристигнаа во Брисел за денешниот вонреден самит на НАТО.
„Ќе разговараме за состојбата во Украина, еден месец по почетокот на војната, за зајакнување на одбраната на НАТО членките, но и улогата на Кина во оваа криза“, најави генералниот секретар, Јенс Столтенберг.
Како што вчера најави Столтенберг, лидерите ќе разговараат за испраќање нови борбени групи на истокот на Алијансата, во Бугарија, во Унгарија, во Романија и во Словачка за да се засили присуството на земјите сојузнички во соседството на Русија кои стравуваат од евентуален руски напад на нивна територија.
Алијансата јасно стави до знаење дека секој напад врз нејзина земја членка веднаш ќе го активира членот пет од колективниот договор и ќе доведе до одговорот на сите останати земји.
Но, НАТО и натаму нема намера да влегува во конфликтот помеѓу Русија и Украина, ниту преку затворање на небото над Украина, ниту преку испраќање трупи. Дополнителна помош ќе му биде испратена на Киев за да се справи со руските напади.
Се очекува украинскиот претседател Володимир Зеленски да се вклучи на состанокот преку видео врска и да се обрати на претставниците на 30-те земји. Познато е дека Киев бара од НАТО да го обезбеди небото над Украина, но за најголемиот број земји на Алијансата ваков чекор е незамислив бидејќи тоа би значело директен судир со Русија, а со тоа и можна војна на целиот континент.
Генералниот секретар предупреди дека одлуките што НАТО ќе ги донесе денеска ќе имаат далекусежни последици, а од владите на земјите членки ќе се бара да ги зголемат воените трошоци.
Денеска и утре во Брисел се одржуваат и лидерски состаноци на ЕУ и на Г7 групата, каде ќе се придружи и американскиот претседател. За сите Украина и одговорот на Западот е главна тема.