Политиката на „отворена врата“ на НАТО во последните години, и покрај протестите од Русија, доведе до проширување на Алијансата за две нови членки Црна Гора и Северна Македонија, изјави генералниот секретар на НАТО Јенс Столтенберг.
„НАТО неодамна потврди дека нејзината политика на „отворени врати“ не е само зборови, туку и дела, вклучително и со поканување на две нови членки. Црна Гора и Северна Македонија станаа членки, односно во последните години се проширивме за две нови членки и покрај протестите од Москва. Ние, исто така, ја поддржуваме Украина во нејзината желба да се приближи до членството во НАТО“, рече Столтенберг на заедничката прес-конференција со украинскиот претседател Владимир Зеленски.
Шефот на НАТО додаде дека Алијансата и во иднина ќе остане верна на својата политика.
„Јас присуствував на самитот во Букурешт во 2008 година, кога сите сојузници се согласија Украина да стане членка на НАТО. Ние се придржуваме до таа одлука, како и до другите што беа усвоени по тој самит“, додаде тој.
Според генералниот секретар, „пораката до Русија е дека Украина е суверена држава и може да го избере својот пат, а сојузниците можат да одлучат кога таа ќе биде подготвена да стане членка на НАТО“.
„Сега сме фокусирани на реформите за да може Украина да ги исполни стандардите на Алијансата. Ја поздравувам силната посветеност на претседателот Зеленски за такви реформи“, рече Столтенберг.