Тројца албански интелектуалци, Ким Мехмети, Арсим Зеколи и Рамадан Рамадани, вчера излегоа со отворено писмо до лидерот на ДУИ, со порака дека не му се плашат.
Повод за ова писмо се пораките што Ахмети ги упатил до албанските интелектуалци, аналитичари и публицисти на славеничкиот концерт на ДУИ, кој се оддржа на денот кога во Македонија се врати Јохан Тарчуловски:
„Јас имам една порака до сите оние кои мислеле и ќе помислат во иднина дека ДУИ е сила која му наликува на жар а таа е – ако ја допреш ќе те изгори“.
Во писмото на тројцата албански интелектуалци се вели:
„Забележувајќи дека два пати по ред, за кратко време, јавно ги спомнувате аналитичарите и публицистите, и не сакајќи ова да ви се случи и по трет пат, и уште помалку да ви прерасне во навика, сакаме да Ве потсетиме на едно основно правило кое го знае мнозинството луѓе кои имаат формално редовно образование: коментаторите на јавното мислење и на општеството се набљудувачи и не се странка во процесите и појавите.
Исто така сакаме да ви кажеме дека ’јагленот’ е изгаснат жар, и дека доколку во иднина посакате да ни се заканите преку метафори, треба да внимавате како ги употребувате, бидејќи кога ги употребува некој што не го знае нивното значење, тогаш говорот може да заличи на лаење “,
Ние сите ги знаеме вашите пропаднати набљудувања и аналитички тентативи: во геополитиката, во литературата, во верата и во општеството во минатото, додека во овој момент сме фокусирани на разоткривањето на сегашната шема на вашето политичко вазалство, која продолжувате да ја практикувате со страв и недостаток на знаење и личен лидерски капацитет.
Ние исто така го знаеме и нашиот грев, кој, и доколку ни го простат другите, ние нема да си го простиме на самите себе: со нашата маленкост Ви помогнавме во времето кога не смеевте да дојдете во Скопје, надевајќи се дека нема да се ’јагленисувате’ и ќе останете жар кој ќе го држи запален пламенот на демократизацијата на албанското општество и на слободното албанско мислење.
И кој би можел тогаш да предвиди дека вие ќе се занимавате со тоа што го правите денес – со тоа што со векови го правеле другите на овие простори и за што немавме потреба за вас: со раздорот на Албанците на добри и лоши“.
Затоа, не се замислувајте дека вашите закани ќе не’ присилат да се откажеме од нашите убедувања и начинот на кој ја согледуваме и оценуваме оние кои си замислуваат дека гласот на мнозинството од народот е подеднаков со колективната мудрост на еден народ.
Или пак го немааат разбрано фактот што имало политичари кои никогаш не ги изгубиле изборите, кои биле најгласани од сите, за на крајот да бидат толку обезличени што не можеле да разберат дека е полесно да владееш со другите, отколку да владееш над себеси.
Паднаа сите Албанци на српските кралеви, сите Албанци на Пашиќ, Тито, Ранковиќ, Колишевски, Глигоров, Георгиевски, Црвенковски, сите оние кои по своето вазалство многу наликуваа на вашето параполитичко однесување во сенка на Мијалков и Груевски.
На овие простори минувале и поминувале многу владетели, но она што секогаш останувало е постојаната и бесмртна идеа за слобода и албанство. А таа идеа опстојувала и живеела и пред да се вратите од Швајцарија, и ќе опстои и откога вие конечно ќе се вратите во вашиот Зајаз, каде како пензионер, на мира ќе ви се разјасни дека во времињата кога вие си ја браневте фотелјата дадена од Груевски, ние сме се бореле да го сочуваме своето достоинство, чест и совест.
Ние не можеме, ниту пак имаме намера, да ја сопреме Вашата страст за прикривање на вашата интригантска природа и вашата потреба за маскирање на потполната капитулација пред палката на Груевски. Потполно свесни за вашето политичко потекло и вашиот подмолен модус операнди, вие би можеле дури и физички да ни затворите устите.
Свесни за вашите образовни хендикепи и симплистичкиот начин на размислување, го завршуваме ова писмо со една јасна и кратка порака: ’Не ти се плашиме’!, се вели во писмото на тројцата интелектуалци Зеколи, Мехмети и Рамадани до лидерот на ДУИ, Ахмети.