Партијата ГЕРБ (Граѓани за Европски Развој на Бугарија) на која припаѓа актуелниот премиер на Бугарија, Бојко Борисов, доби најмногу гласови на изборите кои се одржаа на 4ти април, 2021. Односно после 77% од избројаните гласови, ГЕРБ има 26% од гласовите.
Без разлика што за сега изгледа дека Борисов го има мнозинството гласови, многумина сметаат дека овој пат ќе биде тешко ГЕРБ да формира коалициона влада.
Изненадувачки, новата протестна партија на телевизискиот водител Слави Трифонов „Има таков народ“ доби 18% од гласовите и е втора најпопуларна партија во овие избори. Трифонов е познат негатор на Корона вирусот и според Deutsche Welle „во моментов е во карантин поради симптоми на Ковид-19“.
Бугарската социјалистичка партија (БСП) се наоѓа на третото место по освоени гласови со 15.7%, а „Движење за права и слободи“ (ДПС), партијата најчесто асоцирана со етничките Турци, освои 10.7%. Исто така коалицијата „Демократска Бугарија“ освои околу 10% од гласовите. ВМРО-БНД освои само 3.6% од гласовите што значи дека нема да влезе во бугарскиот парламент (потребни се 4% од гласовите за влез во парламент).
„Исправи се! Мафија надвор!“ освои 4.9% од гласовите. „Исправи се! Мафија надвор!“ е новата опозициската партија која настана по протестите од летото 2020тата година на чело со некои од лидерите од протестите и поранешната членка на социстичката партија, Маја Манолова. Партијата се залага против корупцијата на Борисов и со своите освоени гласови влезе во бугарскиот парламент.
„Прерано е за славење ама едно нешто е јасно: ова е крајот на Борисов,“ изјави Николај Хаџигенов, член на „Исправи се! Мафија надвор!“.
Борисов сепак смета дека тој е единствениот кој може да ја води Бугарија. Борисов има соработувачки однос со центар-десната канцеларка на Германија Ангела Меркел на ниво на ЕУ и е клучно инволвиран во центар-десната политичка група во европскиот парламент European People’s Party. Борисов се залага голема коалиција на експерти кои ќе ја водат државата за време на Ковид пандемијата.
Според бугарскиот социолог Цветозар Томов ГЕРБ има само една шанса за формирање на коалиција со БСП и ДПС. Но шефицата на социјалистичката партија (БПС) Корнелија Нинова веќе се има изјаснето против оваа идеја. „Наш принципиелен став е анти-ГЕРБ коалиција“, изјави Нинова.
Во декември, 2020, владата на Борисов го блокираше влезот на С. Македонија во Европската Унија поради несогласувања околу историски и идентитетски прашања – потег кои многумина го сметаа за контроверзен. Ако ГЕРБ не успее да формира коалиција со било кои од другите бугарски партии, тоа отвара прашања за каква надворешна политика ќе води Бугарија и какви ќе бидат ефектите од идната бугарска влада врз С.Македонија.
„Или некој треба да преземе чекори кон некои неподносливи компромиси или следниот парламент ќе трае прилично кратко,” изјави Бојана Димитрова од Alpha Reseach.
Елена Гаговска