Оваа македонска власт има сериозна демократска фалинка и таа ќе падне, ама на демократски начин. Власта треба да биде поразена на избори. Колку и да изгледа невозможно, со оглед на речиси целосната владина контрола врз сите општествени текови, тоа ќе се случи. Ама неминовно ќе се случи, па макар и да отворат уште два затвора во Македонија.
Нејсе, секогаш сум сметал дека воопшто не е доблесно да се критикуваат критичарите на власта или активистите на опозицијата. Посебно не во услови на ваква страшна доминација на власта каква што е во Македонија.
Но, иако е разбирливо чувството на немоќ на опозицијата, таа мора да разбере дека ако сака да биде власт, тогаш мора да биде 100 насто различна од оваа власт. Мора да биде без компромисно демократски ориентирана. Мора да биде различна со идеји, програма, однесување. Ама не само преку говорите на лидерот или партиските првенци, или преку програмата што ја промовираат, туку и во односот кон случувањата на теренот.
Не може, господа, од опозицијата да реагирате на вулгарностите на Мирка а да молчите кога истото го прават оние другите само затоа што ви одговараат нивните ставовите. На Македонија не и треба нов Груевски, ама скраја да е и од нови Миленковци и Латасовци. Нивните навреди не треба да бидат повод за нови навреди. Така не се создаваат нови вредности.
Та налет нека е промената ако на Миленко и на Латас треба да им се спротивстават со некави нивни антиподи, без разлика колкав степен на вистина има во тоа што го зборуваат.
Па од вулгаризмите и гнасотилаците на владините „перачи на мозок“ треба да се ослободи општеството.
Ама да се ослободиме, а не да ги смениме со други. Храбри биле демек тие што ја критикувале власта со пцости и вулгаризми!?
Аман бе, па од Фејсбук направивте политика. Гачките искажани на профилите на социјалните мрежи станаа институционална вредност. Не дека немаат вредност, јавноста, новинарството, треба да е многу повеќе од пцости и гачки на необразовани таканаречени новинари.
Ако навистина сакате да сте му посветени на народот, на средната класа , на слобода и демократија, вашите активисти нека ја намалат егзалтацијата од бруталните говори, пишувања и плукањата на новите “новинаришта” само затоа што маваат по спротивната страна. Докажете дека не сте популисти, макијавелисти како овие од власта.
Не ги подржувајте господа, пратеници, активисти и симпатизери, плукачите од која било позиција да плукаат. Така агонијата само продолжува.
Зоран Ќука
aвторот е новинар