Речиси 100 полициски службеници навлегоа во трибините растргнувајќи ги со солзавец навивачите на фудбалскиот клуб Шалке 04 на синоќешниот натпревар од Лигата на Шампионите против грчки ПАОК.
Во 75-та минута, навивачите на клубот од Гелзенкирхен извадоа македонско знаме.
Кога интернационалецот на Словачка, Мирослав Шток погоди за израмнување на резултатот на 1-1, по преголемата бука на стадионот Велтинс-Арена, се чинеше дека домашните навивачи се свртеа против својот клуб, но всушност се се должеше на инцидентот на трибините.
Во соопштение издадено после натпреварот, Шалке се обидоа да ја разјаснат ситуацијата.
„Навивачите извадија банер „Комити Скопје“, бидејќи нашите и навивачите од Скопје се побратимени“, се вели во соопштението.
Клубот од Гелзенкирхен ја осуди полициската операција нарекувајќи ја „прекумерена“.
„Преку овој банер, навивачите на ПАОК се почувствуваа силно испровоцирани. Ситуацијата на едниот крај ескалираше, а грчките навивачи се заканија дека ќе ја напднат трибината на домашните навивачи. Мора да се напомене дека и на другата страна, кај гостинските навивачи имаше огномети и бакли кои провоцираа“.
Банерот со старото македонско знаме со Сонцето на Вергина, беше употребувано од 1992 до 1995 година како симбол за Република Македонија.
„За време на почетните минути од натпреварот, забележавме банер – силно навредлив за грчките навивачи“, изјави портпаролката на полицијата од Гелзенкирхен.
Запрашана како едно македонско знаме би можело да предизвика ваков инцидент, таа изјавила „Тоа не смеам да ви кажам сега“.
„Оваа операција беше прекумерена, ние не ја разбираме. Бараме итен разговор, инцидентот мора да биде разгледуван“, изјави Питер Питерс, член на извршниот одбор на Шалке.
Членот на претседателството на Шалке 04, Хорст Хелт, ја критикуваше полицијата и рече дека е зачуден што таа интервенирала во делот каде што се наоѓале домашните навивачи, зашто, како што нагласи, тој слушал експлозии од пиротехнички материјали на другата страна од стадионот.
„Ако нашите навивачи на викендот во Хановер однесат знаме од Ајнтрахт Брауншвајг, дали и тогаш ќе интервенираат 200 полицајци?“, прашува Хелт.
Повредени се неколку луѓе, а Скај Спортс известуваше дека млада девојка е префрлена на интензивна нега по синоќешниот инцидент.