НОВА дознава дека од функциите ќе бидат разрешени и директорите на Клиниката за гинекологија и акушерство, Марија Хаџи Лега и на Клиниката за очни болести, Илијаз Исмаили.
Аспазија Софијанова ќе биде разрешена од функцијата директорка на Клиниката за детски болести, неофицијално дознава НОВА од свои извори. Иако за неа имало силни лобирања и притисоци, наводно одлуката за нејзината смена била донесена денеска.
Во ист пакет, од функциите ќе бидат разрешени и директорите на Клиниката за гинекологија и акушерство, Марија Хаџи Лега и на Клиниката за очни болести, Илијаз Исмаили.
Нашите извори велат дека на клиниката за гинекологија од три можно кандидати за избор се уште не е одлучено кој ќе седне на директорското столче, велат нашите извори, додека Беким Татеши ќе седне на директорското столче на Клиниката за очни болести.
Министерот Арбен Таравари ниту ја потврди, ниту ја демантираше оваа информација. Тој посочи дека кадровски смени ќе има во текот на оваа недела и наредната недела, така што планираат до септември да завршат кадровските смени на сите клиники и болници во државата. Таравари рече дека повеќето од директорите биле избрани по строго партиска линија , но имало и такви кои покажале резултати во работењето и ќе останат на функциите.
„Процесот е во тек се скенираат сите клиники, добиваме одредени информации и од отворените телефонски линии и од лични контакти. Досега се сменети двајца директори, ќе продолжиме и оваа недела и во тек на следната недела со кадровските смени за до септември да биде завршен тој процес“, изјави министерот Таравари за НОВА.
Но, вработените сметаат дека овој процес оди многу бавно и бараат тоа да бидат слободоумни и професионални личности. Таравари нагласи дека нема да ги игнорира ваквите барања и дека тоа ќе биде прв услов при изборот.
„Пред се критериум ќе биде професионалноста, да биде авторитет кој може со своите квалитети да биде успешен директор. Јас нема да бидам успешен министер ако немам квалитетни директори да помагаат во развојот на клиниката. Ќе инсистирам во изборот да влијае и стручниот колегиум. Овој период на утринско кафе ќе посетам неколку клиники и болници, тоа го правев и досега и веќе имам информации каде што треба да се смени. За жал, повеќето од нив се избрани по одредена партиска линија, а некои и ќе останат“, рече министерот Таравари.
Смената на економските директори сепак не може да се случи веднаш бидејќи за тоа се потребни промени во Законот за здравствена заштита. Според информациите законот веќе се работи, а во тоа учествуваат коморите, синдикатот, претставници од здруженија на пациенти и сите што се инволвирани. Се тоа ќе направи директорите сами да се повлечат, така што по еден директор е доволно на секоја клиника, дали тоа ќе биде лекар или менаџер не е важно, вели Таравари.
Според министерот ќе се прави ревизија на сите клиники да се види досегашното работење и зошто тонат во долгови.
„Ќе се ревидира зошто тонат во долгови. Тоа ќе биде заедничка работа со новиот директор на ФЗО кој ќе седне со еден тим од Министерството за здравство дали е проблем буџетот или неспособноста на директорите. Ќе видиме што може да се направи, дали ќе им с е даде дополнителен буџет или поголем буџет. Зашто во минатото имало некои директори кои биле блиски со поранешниот министер и добивале поголеми буџети“, изјави за НОВА министерот Таравари.