Хеморагична треска-хантан е причина за смртта на педесетгодишниот гостиварец кој почина пред четири дена на Инфективната клиника, неофицијално дознава НОВА.
Хеморагична треска предизвикана од хантан вирусот е причина за смртта на педесетгодишниот гостиварец кој почина пред четири дена на Инфективната клиника. Кај него е пронајден висок титар на Хантан вирус, неофицијално дознава НОВА од лекарски извори. Станува збор за хеморагична треска при која откажуваат бубрезите поради инфекција со Хантан вирус.
Причината за смртта кај синот се уште со сигурност не е утврдена бидејќи во мострите земени за анализа не се развиле антитела.
Преносител на заразата е полскиот глушец кој овој вирус го исфрла преку изметот, плунката и мокрачата. Луѓето се инфицираат кога ќе дојдат во контакт со овие работи исфрлени од глушецот. Искуствата низ годините во пракса кажуваат дека од вирусот најмногу заболувале војниците, шумарите, сточарите, ловците кои многу лесно доаѓаат во контакт со заразниот материјал.
Инкубацијата трае две до четири недели по инфекцијата. Заболениот има треска, главоболка, температура, стомачни болки, повраќање, се јавуваат точкести крварења од кожата, тахикардија, како и хеморагичен шок. За неколку дена доаѓа до намалена функција на бубрезите и нивно откажување . Смртноста од оваа заболување изнесува од 0,1 до 15 проценти.
Стручњаците велат дека нема место за паника бидејќи во случајот е исклучена можноста од Конго-Кримска хеморагична треска која е многу опасна и заразна болест.
Обдукција кај таткото не е направена бидејќи не дозволиле роднините. НОВА неофицијално дознава дека при обдукција на телото на неговиот син, 23 годишното момче не е утврдено никакво труење со пестициди или други препарати за што исто така имало сомнеж.
На инфективната клиника донесени се уште три нови случаи, што значи вкупно девет заболени. Скоро сите се во роднински врски и од истиот регион селото, Симница кое се наоѓа на 10 километри од Гостивар. Лекарите велат дека кај хоспитализирани се уште е рано за да се создадат антитела на болеста и да се знае причинителот.
Екипи од Министерството за здравство, Санитарната и здравствена инспекција, од Агенцијата за храна и ветеринарство се наоѓаат во селото Симница.
Во трлото каде што чувале овци се врши дезинфекција и дератизација, велат за НОВА од Министерството з а здравство. Како што соопшти министерот Арбен Таравари мостри за анализа се испратени и во Тирана и Приштина за да се утврди со сигурност причинителот на болеста. та.
Како што вчера објави НОВА, Институтот за јавно здравје во ваква ситуација кога починаа двајца луѓе нема реагенси за да утврди за која болест или за кој тип на хеморагична треска се работи, така што директорот бил принуден преку приватни врски да земе на заем реагенси од Косово.
Референтната лабораторија во овој Институтот нема реагенси за многу други опасни заразни заболувања бидејќи им е блокирана сметка поради две извршни решенија, немаат да платат за струја на ЕВН и заостанат долг кон фирмата Фармахем.
Од Министерството за здравство велат дека се уште не размилсуваат за прогалсување на епидемија иако заболените се во роднински врски и според законот во таква ситуација за било која заразна болест се прогласува епидемија.