Руски државјанин утринава околу 10 часот упаднал во претседателската вила на Ѓорѓе Иванов, за што биле алармирани членовите на претседателската служба за обезбедување, јавуваат македонските медиуми.
Непоканетиот гостин се обидел да ја прескокне оградата од задната страна на вилата, по што бил забележан од системот за видео надзор.
По интервенцијата, тој бил пренесен во полициска станица, каде што било откриено дека станува збор за 33 годишен руски државјанин кој изјавил дека не знаел дека влегува на претседателски имот, а неговата намера била да побара помош затоа што се изгубил по пешачењето на Водно.
Интернет порталот Република објави дека станува збор за Денис Червов од Русија. Тој направил свој Фејсбук профил пред само неколку дена и на истиот има објавено 3 фотографии. На една од сликите тој е фотографиран на скопскиот плоштад пред Воинот на коњ, додека пак на другата е сликан пред Библиската лига, односно христијанска организација на евангелското единство на Македонија.
Во моментот додека бил вклучен алармот и траела потрагата по дворот, претседателот Иванов не бил во вилата.