Нерегуларностите во вториот круг локални избори започнаа- регистрирани се во Кочани, Велес и Гостивар, информираше извршниот директор на МОСТ Дарко Алексов.
На гласачкото место 0848 во општина Кочани недостасувале листови од извадокот од избирачкиот список во кои се впишани 90 гласачи. Известена била ОИК и гласањето е се уште во прекин.
Прекин во гласањето во општина Кочани има и на гласачките места 0837, 0850 и 0852, поради тоа што на секое од тие гласачки места недостигал по еден лист од избирачкиот список.
На гласачкото место 2164 во општина Велес гласач фотографирал гласачко ливче и по реакцијата на Избирачкиот одбор си заминал, но му била задржана личната карта.
Општинската изборна комисија и полицијата биле информирани, што довело до прекин на гласањето 40 минути. По нивната интервенција гласањето продолжило.
Утрово се случи инцидент на избирачко место 1743 во Струмица, кога околу 9.18 часот едно лице искршило една гласачка кутија во ова избирачко место, јавува Телма.
Избирачкиот одбор повикал полиција, а лицето кое ја скрши кутијата е приведено. Гласањето е во прекин, но од избирачкиот одбор веруваат дека гласањето ќе продолжи.
На гласачкото место 0408 во општина Гостивар од петте членови на Избирачкиот одбор само еден член ја носел потребната легитимација.
Во гласачкото место 2870 во општина Центар гласањето започнало со 10 минути задоцнување.