Семејството на Мартин Нешкоски, односно неговата мајка и неговиот чичко денеска во Јавното обвинителство поднесоа кривична пријава против екс-министерката Гордана Јанкулоска, против Дејан Митревски – Урко, против премиерот Никола Груевски и поранешниот шеф на УБК, Сашо Мијалков.
Како што се вели во пријавата која ја поднесе семејството, против Урко пријавата е за давање на усна наредба спротивно на членот 154 од Законот за внатрешни наредби, кога го распоредил полицаецот Игор Спасов за обезбедување на простор за прослава на ВМРО ДПМНЕ зa победата на парламентарните избори, кој го уби Мартин Нешкоски на 06.06.2011 година.
Против Јанкулоска, во пријавата е наведено дека таа не изготвила писмена наредба согласно членот 154, а заедно со Груевски и Мијалков свесно и намерно ја прикривале истрагата со цел да спречат штета во МВР и врз себе.
Чичкото на Нешкоски го најави утрешниот протест под паролата „Убиство кое не смее да остане во тајност“, на кој ќе се одблежат четири години по смртта на младиот Мартин. Протестот ќе биде во 18 часот пред влада од страната на улицата „Климент Охридски“.
При одговорање на новинарско прашање дали веруваат дека Обвинителството на чело со Марко Зврлевски ќе постапи по пријавата, чичкото Сашо Петрески рече дека како граѓани тие должни да ја поднесат, но дека не веруваат во оваа институција со ваков состав.
Воедно, кога семејството Нешкоски влезе во објектот на ОЈО за да ја поднесе пријавата, поради дождот новинарите застанаа пред влезот на зградата, пред се да ги заштитат камерите, но во тој момент излезе претставничка на обезбедувањето која бараше од новинарите да се симнат од скалите, и да се вратат на местото.
И покрај барањата на активистите и новинарите, обезбедувањето да одговори зошто би требало да се тргнат кога немаат никаков мотив, претставничката рече дека се прави непотребна тензија по што неколку пати бараше новинарите да се тргнат неколку метри понастрана од влезот.