Зошто македонските граѓани се плашат да го изразат своето незадоволство на јавни манифестации и протести или отворено да го кажат своето мислење за одредени работи. За експертите, најголем виновник е грубата политизација на општеството во сите негови сегменти, се вели во анализата на Слободна Европа.
Преовладува мислењето дека луѓето го одмолчуваат својот став со цел да не бидат злоупотребени и етикетирани дека ја одработуваат агендата на политичките партии.
Некои истражувања покажуваат дека луѓето се плашат да зборуваат од егзистенцијални причини, поточно да не го изгубат своето работно место, или да бидат девалвирани.
Најголем револт предизвикува тоа што не може граѓаните да го изразат повидливо своето незадоволство, а веднаш потоа да не се организираат контра протести, кои меѓу редови значат одземање на правото на критичен глас.
Дел од експертите и интелектуалците велат дека јавно не зборуваат за актуелни настани или сè помалку го прават тоа, бидејќи се разочарани од интерпретацијата на јавно кажаниот збор во медиумите.
Преовладува мислењето дека силната партизираност на медиумите е причина за отсуство на вистински дебати, а некои интелектуалци сè повеќе се сомневаат дека навистина ќе може да го искажат својот став без да бидат ставени нивните зборови на контото на едната или другата партија, односно да бидат политички обоени и етикетирани.
Според некои размислувања, отсуството од јавната сцена се должи на стеснувањето на просторот каде што слободно може да се изнесе сопственото мислење без тоа да помине низ филтерот на цензурата, вели за Слободна Европа, социологот Илија Ацески.