Резултатите од пописот не се прифатливи ниту за српската заедница во земјава. Во телефонски разговор за НоваТВ пратеникот и лидер на Демократската партија на Србите (ДПС), Иван Стоиљковиќ вели дека со пописот недовербата кон институциите попримила загрижувачки карактер. „Не може од попис на попис Србите во Македонија да се намалуваат за 1/3. Нашите прогнози за бројот на српската заедница во Северна Македонија и врз основа на членските книшки издадени од страна на ДПС, покажува дека Србите се во далеку поголем број , од оној што е соопштен како резултат од пописот“ вели Стоиљковиќ.
Оттаму Стоиљковиќ и на ФБ и во разговорот со нас, најави организација на електронски и теренски попис само за претставниците на српската заедница кој се надева да го спроведе наесен со помош и поддршка на матичната држава.
„ Попишувањето ќе биде доброволно, а попишаните лица ќе добијат службено уверение кое ќе можат да го користат при остварување на правото на образование, стекнување имот, добивање државјанство, како и за други привилегии во нашата татковина, Република Србија. Исто така, лицата чии презимиња се на „иќ“, а ја немаат оваа потврда, нема да бидат третирани како валидни претставници на српскиот народ во македонската администрација, туку како кукавички јајца спуштени во нашето гнездо. Ова важи и за политичките и за невладините организации со префиксот „српски“, а всушност основани за потребите на одредена политичка партија како привремено покритие за немањето на српски партнер во нивната коалиција, кои со своето неработење, односно со поддршката на криминалните пописните активности од позиција на власт ги десеткуваа Србите и се директни виновници за оваа ситуација. За се ќе бидете навремено информирани“, напиша пратеникот и претседател на Демократската партија на Србите во Македонија, Иван Стоиљковиќ, на својот фејсбук-профил.
На Пописот, од вкупното резидентно население во земјава 1,3 проценти се изјасниле како Срби , соопштија од Државниот завод за статистика.
(М.Т.)