Пред хотелот „Холидеј ин“, во водите на Вардар никнати се неколку бетонски столбови, кои ќе ја држат идната галија која треба да се смести на овој простор.
Според проектот на град Скопје ова е една од четирите галии кои што треба да бидат поставени во реката Вардар.
Една од нив е веќе во изградба и се наоѓа во коритото спроти новоизградениот Стар театар, на десната страна на речното корито.
Објектот го гради фирмата „Фаланга ДИМ“ која го доби договорот за изградба и на втората галија, за која се поставија бетонските темели. Фирмата ќе стопанисува со нив 10 години и ќе треба на Град Скопје да му плаќа кирија од 1.050 евра за едниот сплав, и 1.250 евра за другиот.
Сплавовите ќе се користат како угостителски објекти.
Основач на фирмата „Фаланга ДИМ“, која ќе стопанисува со двете галии е Давор Андреевски, газда на познатото скопско фризерско-козметичкото студио „Диор“. Тој, барем досега, не се занимавал со угостителска дејност.