Познатиот македонски поет, Никола Маџиров денес ќе присуствува на отворањето на изложбата на фотографии „Која е целта на поезијата?“ на Саемот на книгата во Франкфурт, кој трае од 9-ти до 13-ти октомври.
Во фокусот на изложбата е современата европска поезија на која ќе бидат изложени 47 фотографии на кои се појавуваат исто толку селектирани поети, по еден од 47-те европски земји.
Поетите ќе се обидат на свој начин да дадат одговор скриени зад црвени маски и со табла во рацете врз која се испишани нивните ставови.
Настанот е во организација на „Литературверкштат“, куратор на изложбата е белорускиот уметник Сергеј Шабохин, а на отворањето ќе зборува и директорот на Саемот на книгата во Франкфурт.
Автор на фотографијата на која се појавува Никола Маџиров е Андон Давчев, а направена е во Македонија. Маџиров допатува во Франкфурт по тринеделните поетски читања низ неколку универзитети во САД.