Теренот за Парада на гордоста требаше подобро да биде подготвен, а не да се дозволи тоа прашање да го загрози патот кон ЕУ за кој вложивме огромни напори, изјави претседателот на Србија, Томислав Николиќ и додаде дека подготовките за следната година треба да почнат уште денес.
Тој вели дека според Уставот на Србија, сите граѓани, па и припадниците на ЛГБТ заедницата имаат загарантирано право на собири и тоа е еден од постулатите за кои Србија се залага во борбата за човекови права.
„Сите граѓани, без разлика на сексуалната и друга ориентација се еднакви во своите права и државата на тоа треба да се посвети на адекватен начин“, се вели во соопштението на кабинетот на Николиќ, јавува РТС.
Според него, со тоа што станува збор за комплицирано прашање, кое поединци и одредени групи би можеле да го злоупотребат, спротивно на интересите на Србија и тешката ситуација во која се наоѓа Србија, во организацијата на тој настан требало да бидат вклучени сите клучни инстанци, меѓу кои медиумите, невладините организации и меѓународните институции.
„Бидејќи тоа не е направено, сега имаме ситуација да еден помалку значаен настан може да го загрози европскиот пат на земјата, во кој минатата година инвестиравме огромни напори“, нагласи Николиќ.
Тој напомена дека неговата земја заслужила да биде дел од европското семејство и рамноправен партнер на целиот свет, и затоа очекува подготовките за следната година да почнат уште денес.