Дополнителниот заменик-министер за земјоделство, шумарство и водостопанство, Љупчо Николовски, денеска соопшти со колкаво земјиште располага водителот Миленко Неделковски, за кое вели го добил од премиерот Никола Груевски за неговата соработка.
Како што вели Николовски, додека сточарите молат за парче земја, Миленко Неделковски располага со пасишта со површина на која може да се сместат 250 игралишта и тоа за само 60 кози.
Според договор склучен во 2009 година, концесионер на површината е Натурал Фудс ДОО Градско и друштвото за продукција, Вондер Интернационал М ДООЕЛ Скопје, а во сопственост на Виолета Неделковска. Управител на Вондер Интернационал М ДООЕЛ е Миленко Неделковски, а и двете фирми се регистрирани на иста адреса.
Заменик-министерот потенцираше дека според овој договор, фирмата Натурал Фудс ДОО Градско, со само 60 кози располага со земјиште кое одговара на над 700 грла добиток.
Миленко Неделковски, ЈуТјуб фотографија
Тој побара од Агенцијата за храна и ветеринарство да одговори колку кози на денешен ден ма фамилијата Неделковски и дали е достигната бројката на договорени грла.
Љупчо Николовски побара и од Агенцијата за финансиска поддршка на земјоделството и руралниот развој да достават податоци колку субвенции користат, дали се посетувани од инспекција, дали произведуваат или површините се користат само за добивање субвенции.
– Нареднава година, секој што се огрешил, ќе одговара пред законот, рече дополнителниот заменик-министер.
Неодамна Николовски во интервју за НОВА, објави дека и пратеничката Весна Пемова, потоа сопругата на пратеникот Александар Спасеновски, која воедно е и шеф на Кабинетот на претседателот на Собранието Трајко Вељаноски, исто така се корисници на земјиште доделено од Владата.