Државата што побргу да изнајде начин со кој ќе се финансира превентивата на ХИВ/СИДА и ТБЦ, бидејќи по 2016-та година кога Македонија ќе престане да добива пари од Глобалниот фонд постои опасност да се зголеми стапката на заболени, реагираат од Секретаријатот на Националниот координативен механизам кој управува со грантовите на Глобалниот фонд.
Од таму потенцираат дека политичката волја и континуираното финансирање може да придонесат кон одржување, да не букнат овие опасни болести.
-Клучната улога ја има Министерството за здравство, но и Министерството за правда кое работи со затвореници, како и финансии и локалната самоуправа. Потребно е тие да одвојуваат поголеми финансиски средства за да овие програми продолжат со спроведување и по повлекувањето на Глобалниот фонд од нашата земја, изјави за НОВА, Даниел Калајџиески од Секретаријатот на НКМ.
Во изминатите десет години преку Глобалниот фонд за борба против СИДА, туберкулоза и маларија добиена е неповратна финансиска поддршка во износ од 26 милиони американски долари.
Во моментов државата преку превентивните програми финансирани од буџетот обезбедува бесплатна терапија за ХИВ и туберкулоза за сите граѓани на кои што им е потребна, додека превентивните активности целосно се финансирани од Глобален фонд. По 2016 година, кога завршува финансирањето од Глобален фонд, нема да бидат потребни само средства за третман, туку многу повеќе средства за превентивни активности, велат од НКМ.
Иако Македонија спаѓа во групата на земји со ниско ниво на случаи со овие болести, со превентивните прегледи во март преку овие програми, од 44 испитани случаи во населбата Шуто Оризари откриени с е два сомнителни случаи на ТБЦ, дознава НОВА.
Минатата година откриени се 323 нови случаи со ТБЦ, а заклучно со 2013 година регистрирани се вкупно 194 случаи со ХИВ. Податоците добиени од невладиниот сектор говорат дека само за советување и тестирање годишно преку програмите се трошат над 70 000 евра, за третман и дијагноза на сексуално преносливи болести над 60 000 евра, за сексуални работници околу 200 000 евра.