Цели шест години не постоела Комисијата за утврдување на бенефициран стаж во Министерството за труд и социјала со што не можело да бидат разгледувани барања на работниците за утврдување на професиии со бенефициран стаж. Правилникот кој постои од 2011 година не се почитувал ,а работите биле запоставувани и не можело да се направи ревизија, потврдија од Министерството за труд и социјала. Вкупно 28 452 работници во државата се со бенефициран стаж(полиција, армија, рудари), а 41 161 имале варијации во својот бенефициран стаж.
Овие работници кои имаат прекин во бенефицираниот стаж ќе можат да остварат право на пензија од идната година кога се очекува да завршат законските измени, како и со новиот концепт на пензионирање што го подготвува Министерството за труд и социјала.
Новиот концепт предвивува дефинирање на возраст за пензионирање и процент на поминати години на работно место со бенeфициран стаж.
Ова значи дека работниците кои одат во пензија на возраст од 55 години ќе треба да имаат остварено и одреден процент (80 отсто) од работниот стаж поминат на работни места со бенeфициран стаж.
На овој начин ќе исправи грешката според која, рудар на 65 години не може да оди во пензија доколку не работел 30 години на исто бенефицирано работно место.
За да се воведе работно место со бенефициран стаж треба да се испитаат условите под кои работи работникот, дали се преземаат сите мерки за безбедност, дали работниците често се разболуваат, дали настануваат повреди , дали просторот е обезбеден ако работат на отворено, велат во Министерството за труд и социјала.
Од таму потенцираат дека во моментот барање за испитување на условите за бенефициран стаж имаат поднесено работниците од Мермерниот комбинат во Прилеп и од РЕК Битола. Од Министерството најавија итно формирање на комисија.
„ Оваа Комисија не била формирана воопшто во 2012 година. Со ова се оневозможува барањата кои стигнуваат за утврдување на професии кои треба да имаат бенефициран стаж не може да се разгледуваат. Ние сметаме дека освен што ќе биде формирана комисија што поскоро, ќе се направи регистар за професии со ризик и систем на предвремено пензионирање за да им с е вратат правата на работниците“, изјави Мила Царовска, министер за труд и социјална политика.
Во Македонија постојат повеќе професии за кои се пресметува бенифициран стаж каде покрај рударите, спаѓаат и дел од градежните работници вработени во полицијата и одбраната (нуркачи, пилоти), вработени во службите за итна медицинска помош и други јавни установи.