Познатиот руски Бољшој театар повторно го тресат скандали откако Американка која до неодамна беше балерина во Бољшој го обвини раководството дека и биле побарани 10.000 долари за да игра соло точка на сцената, пренесува рускиот весник „Известија“.
Џој Вомак во интервју за весникот трвди дека и покрај потпишаниот договор за солистички настапи, раководството на балетот не и дозволувало да игра соло точки, дека недостапни и биле и хорските изведби, со објаснување дека нејзината игра е премногу индивидуалистичка, пренесува агенцијата Танјуг.
Вомак, која завршила Московска академија за кореографија како прва Американка некогаш, тврди дека сепак постојано и било советувано да си најде сапонзор кој кај управата би се “заложил за неа“ и дека цената на настапот ја дознала откако во Бољшој се вратил уметничкиот директор Сергеј Филин.
Тој неколку месеци отсуствуваше поради тоа што се лечеше од последиците од киселина која му беше фрлена в лице, а во моментов во тек е судење против прима балетанот на Бољшој, Павел Дмитриченко како организатор за нападот мотивиран по одбивањето на Филин да и ја даде улога на девојката на Дмитриченко.
Американката трвди дека човекот, кого одбива да го именува, и рекол дека за една соло варијација во балетот треба да плати 10.000 долари, како и тоа дека и покрај нејзините инсистирања Филин да ја види како игра, тој тоа го одбил.
„Тој ми велеше: не, ти не разбираш, јас веќе знам се. Мене не ме интересира тоа што ти си завршила московско школо, ти само размисли, треба да бидеш полукава“, изјавила Вомак за „Известија“.
Филин моментално не е во Русија – отишол на уште една операција на очите, бидејќи киселината му го оштетила видот, па не бил достапен за контер, објавува „Известија“.
Марина Кондратјева, главен корепетитор на балетот на Бољшој театарот вели дека не е невообичаено тоа што Вомак не добивала соло партии, бидејќи почетниците најпрво играат со другите членови, а таа имала и проблеми при памтењето на чекорите.
Балерината Вомак и покрај тоа што била изложена на корупција вели дека нема да покрене тужба, туку само сака „да заборави на тој лош сон“.