Градот домаќин на Олимписките игри – Токио денеска воведе нова вонредна состојба, на помалку од две недели пред почетокот на Олимпијадата, поради веројатноста дека новите мерки ќе можат да помогнат да се спречи зголемувањето на случаите со КОВИД-19, објави Ројтерс.
Минатата недела, организаторите објавија дека на гледачите нема да им биде дозволено да присуствуваат на скоро сите спортски настани, со што замреа надежите дека Олимпијадата ќе стане масовен спектакл.
Присуството на гледачи од странство беше забрането уште пред неколку месеци, а сега владините претставници бараат Јапонците да ги следат Олимписките игри на телевизија.
„Ги замолуваме луѓето да ги поддржуваат спортистите од дома“, изјави владиниот претставник Кацунобо Като. Олимписките игри, кои минатата година беа одложени поради пандемијата, ќе траат од 23-ти јули до 8-ми август, а вонредната состојба, која е четврта за Токио, ќе е на сила до 22-ри август, непосредно пред почетокот на Параолимписките игри.
Властите и организаторите веќе долго време гледаат на Олимписките игри како можност да го демонстрираат закрепнувањето на земјата од разорниот земјотрес од 2011 година и нуклеарната катастрофа.
Некои од големите имиња во спортот, како тенисерите Рафаел Надал, Серена Вилијамс, Стен Вавринка, Доминик Тием и Симона Халеп веќе објавија дека нема да се натпреваруваат на Олимпијадата, а светскиот тенисер број еден Новак Ѓоковиќ изјави дека сè уште не е донесена конечна одлука дали да учествува во игрите.
Јапонија ги избегна страотните бранови на пандемијата што ги доживеаја другите земји и досега регистрираше вкупно 815.440 случаи на КОВИД-19 и скоро 15.000 смртни случаи од инфекција.