Името на новата грчка државна радио и телевизија ќе биде „Нова грчка радио, интернет и телевизија АД“ (НЕПИТ), се наведува во предлог-законот објавен на интернет за кој треба да се води јавна расправа, објави весникот „Етнос“.
Претходно, владиниот портпарол Симос Кедикоглу изјави дека новиот државен медиум ќе почне со работа до 29 август. Во него ќе работат околу 1.200 луѓе и веќе е направен изборот на вработените.
Портпаролот додаде дека сите вработени од ЕРТ ќе добијат отказни решенија и со новите назначувања ќе им се даде приоритет на луѓе со реален придонес за медиумот во сите изминати години.
Двата најголеми синдиката во Грција – на вработените во приватниот (ГСЕЕ) и во државниот сектор (АДЕДЕ), повикаа утре на 24-часовен генерален штрајк против затворањето на државната радио и телевизија ЕРТ, објавија грчките медиуми.
Грчкото Министерство за финансии денеска објави дека било задолжено да го прекине емитувањето на програмите на ЕРТ и да биде надзорен орган до гласањето на закон за формирање нова современа државна радио-телевизија, објави весникот „Имерсија“.
Во соопштение од Министерството се вели дека ЕРТ е ликвидирана, а емитувањето програми е прекинато.
И вработените во грчката државна радио и телевизија ЕРТ повикаа денеска за протести пред зградата на медиумот во Атина. Штрајк е закажан денеска и во приватни радио-телевизиски канали и во националната агенција АНА-МПА.
Претходно, портпаролот на Комисијата, Оливие Бејли, ги отфрли обвинувањата дека одлуката на Атина е резултат на диктатот за штедење од страна на Брисел.
„ЕК не побара затворање на ЕРТ, но не го доведува во прашање правото на грчката влада за регулирање на јавниот сектор“, изјави портпаролот.