Бомби експлодираа во сунитска населба во Багдад и во околните градови денеска и убија барем 76 лица во најсмртоносниот ден во Ирак во период од над 8 месеци, јавува „Асошиејтед Прес“.
Надлежните велат дека растот на насилствата ги подгрева стравовите дека земјата би можела да биде на пат кон нова рунда на крвопролевање меѓу доминантните Шиити и малцинските Сунити.
Најсмртоносниот напад денеска беше во Бакуба (60 километри северно од Багдад), сунитски град, во кој загина барем 41 лице, а имаше и 56 ранети, при што две бомби експлодираа додека верниците ја напуштаа локалната џамија. Станува збор за две последователни експлозии, при што втората експлодира непосредно по првата, додека жителите од околните улици притрчаа да им помогнат на повредените во првичната експлозија.
Нападите во Багад и во околината го кренаа нивото на убиените лица во последните 3 дена до бројката од 130 лица, вклучувајќи Шиити на автобуски станици и на отворени пазари во сцени кои потсетуваат на одмазднички напади меѓу исламските секти, кои земјата ја доведоа на раб од граѓанска војна во 2006-2007 година.
Тензиите се зголемија откако Сунитите започнаа да протестираат заради злоставувањата од шиитската Влада, вклучувајќи притворања и запоставување. Протестите, кои започнаа во декември, воглавно беа мирни, но бројот на напади остро порасна по безбедносна акција врз протестен камп на Сунитите на северот на земјата на 23 април во која имаше и жртви.