Европската унија денеска објави дека ги проширува санкциите кон Русија, поради нејзината улога во конфликтот во Украина. Со новите санкции е погоден врвот на руските разузнавачки служби, јавува Дојче веле.
Директорот на Федералната безбедносна служба на Руската Федерација (ФБС), Александер Бортников, и шефот на Странската разузнавачка служба на Руската Федерација (СВР), Михаил Фрадков, се само некои од имиња на листата од 15 лица на кои им е забранет влез во ЕУ. На црната листа се најдоа и 18 компании и организации.
На листата се најде и чеченскиот претседател Рамзан Кадиров. Вкупно сега на листата се наоѓаат 87 луѓе и 20 компании или организации.
Бортников и Фрадков се членови на рускиот национален совет за безбедност и ЕУ смета дека „тие се вклучени во обликувањето на политиката на руската влада со која се загрозува територијалниот интегритет, суверенитет и независност на Украина“.
Кадиров, пак, „даде изјави на поддршка за нелегалната анексија на Крим и за поддршка на вооружениот бунт во Украина“. Чеченскиот лидер „изрази подготвеност да испрати 74.000 чеченски волонтери во Украина“, ако тоа биде побарано од него.
Меѓу компаниите погодени со санкциите се наоѓаат фирми со седиште во Крим – украинскиот полуостров што во март беше анектиран од страна на Русија.
Новата листа на ЕУ треба да биде финализирана во вторник и, како што информираат анонимни дипломатски извори, на неа би можеле да се најдат и олигарси блиски до рускиот претседател Владимир Путин. Санкциите во однос на лицата и фирмите објавени денеска стапуваат во сила веднаш, информира агенцијата ДПА.
Членките на ЕУ се подготвуваат следнава недела да воведат и економски санкции, во однос на пристапот до финансиските пазари, продажбата на оружје, енергетска технологија, како и технологија која има двојна – цивилна и воена, примена.
ЕУ сака да ги воведе новите санкции откако официјален Вашингтон обвини дека малезискиот авион, кој леташе на линијата МХ17, бил соборен од страна на проруските сепаратисти на истокот на Украина со ракета од руско производство, се вели во информацијата на Дојче веле.
Извор: Дојче веле на македонски јазик