Новинарите од сега згаснатиот весник „Ден“ се уште ги бараат своите права низ институциите на државата.
Тие бараат од Трудовата инспекција и Управата за јавни приходи да почнат да си ја вршат работата и да проверат зошто фирмата Нова прес, до скоро издавач на дневниот весник „Ден“ се уште нема исплатено плати за декември 2012, јануари и февруари 2013 година, а со тоа не ги платила ниту даноците кои се задолжителни при исплатата на платата.
-Не’ чуди зошто од УЈП не реагираат иако за тоа неколку пати ги известивме. Не се исплатени ниту хонорарите за октомври, ноември, декември и јануари. Бараме и да се утврди врз основа на што на 15 февруари им се дадени откази на вработените и тоа тајно, односно не им се доставени туку тие за нив дознаа од сајтот на Агенцијата за вработување, велат новинарите и техничарите од „Ден“.
Во отказите стои дека тие не се појавиле на работа три дена иако дневниот весник „Ден“ не излегува од крајот на јануари, а од тогаш нема ниту свои простории каде вработените би оделе на работа.
„Бараме надлежните органи да утврдат и врз основа на кој закон на вработените им е исплаќана плата на минимална основа, а остатокот од договорената сума како хонорар. Ги повикуваме сопственикот на Нова прес, Живко Серафимовски и управителот Јово Јовчески да кажат кога ќе престанат со игрите околу тоа кој е сопственик на весникот и кога мислат да ги исплатат парите што ги должат. Го прашуваме управителот Јовчески дали од Серафимовски доби соодветна награда за сите прикаски и лаги за руски бизнисмен и црногорски пари, големи инвестиции и слични лаги кои ни ги кажуваше цели шест месеци“- велат новинарите и техничарите од Ден во соопштението до јавноста.