Здружението LEAD објави прв прирачник за предавање контроверзни теми во училница, наменет за наставници. Според LEAD, предавањето и дискусијата на контроверзните теми се уште е предизвик за наставниците од училиштата во нашата земја и наведува дека 86 отсто од учениците никогаш немале можност да разговараат за тековни општествени прашања во рамки на образованието.
Прирачникот „Предавање на контроверзни прашања преку едукација за демократско граѓанско и човекови права“ е оригинално издаден од Советот на Европа и преведен на повеќе од 15 јазици во Европа. Прирачникот е преведен и бесплатно достапен онлајн на македонски јазик и на албански јазик на веб-страницата на LEAD.
Прирачникот е наменет за професионален развој на наставници и е дизајниран за поддршка и унапредување на предавањето на контроверзни прашања во училиштата. Тој содржи конкретни алатки и техники за предавање и опфаќање различни теми во училница, како што се религија, родови улоги, еднородителски семејства, сексуална определба, екстремизам итн.
Ваквиот пристап на предавање, според LEAD, придонесува за подобрување на знаењата на учениците и за вклучување во дијалог на ученици со различни ставови и вредности, што е од клучно значење за демократскиот процес и неопходно за заштита и зајакнување на демократијата и за негување на човековите права.
– Контроверзните теми, кои ги дефинираме како теми за кои постојат спротивставени мислења во општеството и будат силни чувства кај луѓето, е значајно да се дискутираат во рамки на образовниот процес за да се поттикне дијалог за нив и да се развие свест за важноста од дискутирање кај младите, уште од најмала возраст. Избегнувањето на дискусиите на овие теми и недостигот на конструктивен дијалог води кон поделба на општеството и зголемување на меѓусебната нетрпеливост, истакнува Илија Станковски, програмски директор на Здружение LEAD.
Прирачникот е изработен во рамки на проектот „Наставници за едукација, демократија и човекови права“ имплементиран од Здружението LEAD, заеднички финансиран од Европската Унија и Советот на Европа во рамки на програмата „Демократска и инклузивна училишна култура во функција“.