Промоција на книгата „Обoени приказни“ од осумгодишната Нина Прља, која претставува збирка на цртежи и раскази од творештвото младата авторка во периодот од 2009 до 2013, беше проследена и со изложба на нејзините дела.
Нина Прља (2005) е млад автор кој ја негува љубовта кон уметноста уште од најрана возраст. Таткото на Нина Прља еднаш годишно ги собира нејзините најдобри цртежи и приказни поврзани со нив и ги објавува во вид на електронска книга на Facebook („Како да се симнеш додека стоиш“, 2011 и „Коцкасти луѓе во тетратка со коцки,“ 2012).
Денеска во просториите на МКЦ, во Детскиот кретивен центар, покрај промоцијата, беше организирана и детска работилница, која ја водеше уметникот Ѓорѓи Јовановиќ, а на која децата цртаа свои креации на маици, на шоли, како и на хартија. Публиката, родителите и уметниците се дружеа и работеа заедно.
Промоторот Роберт Алаѓозовски, од издавачката куќа Готен, во чие издание е книгата „Обоени приказни“, повикувајќи се на светските истражувања според кои во училишни рамки креативноста на децата не се поттикнува доволно, зборуваше за потребата да се стимулира и поддржува креативноста кај нив.
