„Пред неколку дена бевме информирани дека кривичната пријава која ја поднесовме сите пратеници од опозицијата против претседателот на Собранието, Трајко Велјановски, заради настаните од срамниот и црн понеделник од 24 декември минатата година, се отфрлува од страна на Обвинителството.
– На обвинителството му беа потребни помалку од три месеци за да брзо побрзо го ослободи Трајко Велјановски од одговорност за се она што под негова палка се случуваше во македонското Собрание“, изјави денеска пратеничката на СДСМ, Радмила Шеќеринска.
Таа потсети дека кривичната пријава, која беше поднесена на крајот на јануари, е потпишана од сите пратеници од опозицијата.
„Сето она што можеше да го види македонската и меѓународната јавност не беше доволно, за да оОбвинителството покрене постапка за грубото кршење на законите и Уставот и злоупотребата на службена должност од страна на Велјановски“, рече Шеќеринска.
„Со ова, Обвинителството уште еднаш покажа дека во Македонија институциите систематски се рушат и се ставаат во функција на партиски цели. Сега можеби ни е појасен фактот дека Јавниот обвинител одлучи своето прво појавување во јавноста да го направи во друштво на директорот на Управата за безбедност и контраразузнавање и со омилениот коалициски партнер на Груевски, Амди Бајрам.
– Претпоставувам дека учеството на ромскиот бал го спречи јавниот обвинител да погледне што се се случуваше во македонсото Собрание пред и на 24 декември и го спречи во вршењето на својата функција.
– Власта се менува, тркалото се врти и во една ситуација во Република Македонија сите овие функционери, сите овие носители на врвни државни фунцкии, кои решија да го газат и Уставот и законите и да вршат партиски задачи, ќе мора да одговараат пред законот“, децидна беше Шеќеринска.