Јавното обвинителство се уште не открива дали се поднесени пријави против осомничени лица во аферата „тајна работилница за лични карти“ откако во саботата објави дека е откриена фабрика за печатење факсификувани документи и притоа посочи дека се постапувало по предметот за фалсификуваните лични карти, кои во МВР биле предадени од од страна на новинарот на Фокус Љубиша Арсиќ.
„Информациите се многу сензитивни и поради тоа не можеме да одговориме на ниедно прашање во врска со овој случај, ниту да споделиме било каква информација во врска со случајот,“ велат од обвинителството за НОВА на прашањето против кого се поднесени кривични пријави. Инсистиравме да ни кажат дали воопшто има пријави, ако веќе не можат да споделат имиња на осомничените, но и на ова прашање го добивме истиот одговор – “во моментев се е сензитивно, наскоро ќе излеземе во јавноста и ќе одговориме на сите прашања”.
Случајот предизвика големи реакции во јавноста, а медиумите блиски до власта шпекулираат дека дека во аферата е вмешано и лице блиско до структурите на СДСМ, кое наводно било во контакт со новинари блиски до опозицијата кои требале да ги пласираат фабрикациите. Во јавноста се објави и дека лицата кои биле приведени во врска со овој случај биле пуштени на слобода, додека едно од нив е задржано за одлежување на стара затворска казна.