Австрискиот канцелар Карл Нехамер денеска соопшти дека од почетокот на февруари ќе се воведе задолжителна вакцинација против ковид-19 за возрасните лица, со закани од високи казни против антиваксерите, јавува Јуроњуз. Станува збор за прва европска земја во која што вакцинацијата станува задолжителна.
Планот за задолжителна вакцинација треба да биде усвоен од австрискиот парламент во четврток, иако дел од опозициските партии изјавија дека потребни се промени во предложеното законско решение.
Во Австрија во моментов 71,6 отсто од населението што брои 8,9 милиони лица досега се целосно вакцинирани против ковид-19, но помал дел од популацијата се противи на имунизацијата против корона вирусот.
Во првата фаза, властите секое домаќинство во Австрија ќе го известат за новите правила. Покрај помладите од 18 години, исклучок од задолжителната вакцинација ќе бидат бремените жени и лицата коишто од медицински причини не можат да бидат вакцинирани, како и лицата коишто прележале ковид-19 во последните шест месеци.
Веќе од средината на март, полициските службеници секојдневно ќе вршат рутински контроли на вакциналниот статус на граѓаните. Индивидуите кои нема да можат да прикажат доказ за вакцинација ќе им биде наложено да го направат тоа, а во спротивност ќе бидат казнети со 600 евра.
Доколку и со ваквите чекори не се постигне вакцинација кај целото население, властите повторно ќе испратат потсетување до граѓаните коишто останале невакцинирани. По ова, на адресите на овие индивидуи ќе бидат испратени покани за вакцинација против ковид-19, а оние што нема да се појават на вакциналните пунктови, тогаш ќе се соочат со казни од 3.600 евра.
Притоа, неодговорните индивидуи ќе има можност да бидат казнети и до четири пати годишно со по 3.600 евра поради одбивањето да се вакцинираат, а притоа нема да им биде дозволено паричната казна да ја заменат со затворска казна.